CHATTING MANANG

Shawng na chatting galaw ai lam hpe hti ngut ai hpang n dai chatting manang ngu ai hpe bai hti yu ga..tinang a matu a kyu nga ai sumtang langai rai na re ngu myit mada ai hku re..n dai sumtang hpe gaw Myitchyinghka hku na she a hkam sha lam she a ningmu ni hpe du sa manaw manang ni yawng a matu sumtang langai hku na ka dat ai hku re..yawng ni hti yu na myit yu sawn yu ga..

a.     Hi

b.    Hello

a.     Kaja nga ni?

b.    Kaja nga ai lo

Nga ai shakram ga ni hte hpang wa ai an lahkawng a online manang hkrun lam dai ni 3 ning hpring sai..

Ndai 3 ning laman hta langai hte langai n masu ai sha teng man ai shiga ni jaw hkat let.. langai hte langai kam hkat ai lam ni lani hta lani grau kaba wa sai.. grau n na gaw jinghpaw myu sha ni rai nga ai majaw langai hte langai myit kap ai lam ni grau kaba wa ai ngu mu ai..

langai hte langai a yak hkak jam jau lam ni hpe myit masin hte madat ya hkat ai.. rau hkam sha lawm ai..langai kabu yang langai kabu lawm ai.. n dai lam ni gaw shakut galaw la hkat ra ai lam ni kachyi myi mung n nga lai wa ga ai..

Manang kaja ngu ai gaw langai kaw na langai kyu lama ma lu na tai ai lam n re.. tinang hku na jaw mayu ai myit sha nga ai.. mai galaw ya na hpe galaw ya mayu ai.. tinang a majaw manang wa myit n pyaw mat na lam hpa mung n kam galaw ai… tim kalang lang gaw n dum sha myi galaw shut ai lam ni mung nga lai wa sai.. dai ten ni hta chye na ya ai myit masin hte mara raw ya ai manang hpe grai chyeju dum ai.. grau mung tsaw ra wa ai.. manang wa shut yang mung chye na mara raw ya ai ten ni hta tinang a myit masin ni grau na kabu lu ai hpe mu lu ai.. hkam sha lu ai..

Masha shada she n mu ga hkat tim langai hpe langai lam shagu hta shadum hkat.. n gun jaw hkat.. sharin hkat let nga wa ai ten ni manu dan la ai.. masha langai a prat hta tinang a myit kata kaw na nan myit kap let hku hkau ai.. kam ai manang langai lu na yak dik ai.. shani shana galoi tim mu hkat nga ai manang ni hta lai hkra myit kraw kata sungdik ai shara kaw na nan hku hkau tsaw ra mat ai gaw majoi n rai na re..

dai ni mungkan hta dinghku num/la shada pyi manang kaja n tai ai ni grai law ai.. langai hte langai ten jaw ai lam hta ningra ai ni grai law ai.. tinang a ningrum ningtau a hkam sha lam hpe n gawn nsawn galaw ai.. tsun shaga hkat ai shaloi mung myit masin kata kaw na madat ya let kaja ai maga hku hpaji jaw hkat n gun jaw hkat ai ni hti dang she rai na re… dai majaw Karai Kasang a man hta ga sadi la let hpang wa ai Christan dinghku ni dai ni hka bra mat ai ni grai law wa ai.. dai hku hka bra wa ai shaloi machyi kaba dik gaw ma ni re.. dinghku hka mat ai hpang dinghku hka mat ai yan lahkawng mung shinggyim uhpawng hta tsap n kam mat/ n gwi mat ai lam ni grai law wa ai… she tsap nga tim myit masin hta gaw masha ni zawn n lu pyaw mat ai.. tinang prat galu kaba lam hpe hkra wa ai..

Ga malai langai… manang kaja ngu ai gaw tinang ntsun tim tinang a myit kata hpa byin nga ai ngu ai hpe chye ya ai da.. An a manang hkrun lam 3 ning hpring ten du hkra langai hte langai chye na ya hkat ai lam ni gaw manang kaja a sakse langai rai na sai..

Prat tup a matu manang kaja tai ga ngu..

Tsaw ra let..

Myitchyinghka

November 7, 2012